သမ္မာကျမ်းစာဖြစ်ပေါ်လာပုံ

ဗြိတိန်နိုင်ငံ၊ ဝေးလ်စ် (ခေါ်) ဝေလ (Wales) ပြည်နယ်တွင် ‘မေရီဂျုံး’ (Mary Jones) အမည်ရှိ အမျိုးသမီးငယ်ကလေးသည် သင်းအုပ်ဆရာ များ၊ တရားဟောဆရာများတို့၏ ဓမ္မတရားတော်များ ကို နားထောင်သည့်အခါတိုင်း ထိုဆရာများကဲ့သို့ သမ္မာကျမ်းစာကို လက်ဝယ်ပိုင်ဆိုင်ကာ ကိုယ်တိုင် ဖတ်ရှုလေ့လာချင်သည့် စိတ်ဆန္ဒများ ပြင်းပြခဲ့သည်။ ထိုအချိန်ကာလ၌ သမ္မာကျမ်းစာအုပ်သည် ရှားပါး၍ ပုံနှိပ်ထုတ်ဝေခြင်း မပြုလုပ်နိုင်သေးချေ။ သင်းအုပ် ဆရာအချို့သည်ပင်လျှင် သမ္မာကျမ်းစာအုပ်ကို မပိုင် ဆိုင်ကြသေးသည့်ကာလ ဖြစ်သည်။

ခရစ်နှစ် ၁၇၉ဝ ပြည့်နှစ်တွင် ဘာလ (Bala)မြို့ရှိ သိက္ခာတော်ရဆရာကြီး သောမတ်စ် ချားလ်စ် (Thomas Charles) ထံ၌ သမ္မာကျမ်းစာအုပ် နှစ်အုပ် ရှိကြောင်း မေရီဂျုံးသည် ကြားသိရသဖြင့် ဆရာကြီးထံမှ ကျမ်းစာအုပ် တစ်အုပ်ကို ဝယ်ယူရန် ငွေ စုဆောင်းခဲ့သည်။ သို့သော် ဖခင်၏ ရောဂါဝေဒနာ ကို ကုသရန်အတွက် ထိုစုဆောင်းထားသည့် ငွေများ ကို သုံးစွဲလိုက်ရသဖြင့် လက်ဝယ်တွင် ငွေလက်ကျန် မရှိတော့ချေ။ သို့သော် စိတ်မပျက် အားမလျှော့ဘဲ ငွေကို ထပ်မံ၍ စုဆောင်းခဲ့ပြန်သည်။

လိုအပ်သည့် ငွေပမာဏ ပြည့်မီအောင် စုဆောင်းမိသောအခါ ထိုငွေကို ယူ၍ သမ္မာကျမ်း စာအုပ်ဝယ်ရန် နေအိမ်မှ စတင်ထွက်ခွာခဲ့သည်။ ရီဂျုံး နေထိုင်ရာမြို့နှင့် ဆရာကြီးနေထိုင်ရာ မြို့သည် မိုင် ငါးဆယ်ခန့် ကွာဝေးသည်။ သို့သော် သူသည် ထိုခရီးကို ခြေကျင်လျှောက်၍ သွားခဲ့ရသည်။ ဆရာ ကြီးသောမတ်စ်ချားလ်စ်ထံ ရောက်သောအခါ ဆရာကြီးက ကျမ်းစာအုပ်တစ်အုပ်ကို အခြားသူအား ရောင်းချလိုက်ပြီးဖြစ်ကြောင်းနှင့် ကျန်တစ်အုပ်မှာ မိမိအတွက်သာဖြစ်ပြီး ရောင်းရန် မဟုတ်ကြောင်း ပြောလိုက်သည့်အခါ သူမအတွက် ခဲလေသမျှ၊ သဲ ရေကျ ဖြစ်ခဲ့ရသည်။ ဝမ်းနည်းကြေကွဲခဲ့ရသည်။

ထိုအခါ သူမက

သမ္မာကျမ်းစာအုပ်တစ်အုပ်ရယူ

ပိုင်ဆိုင်နိုင်ရေးအတွက် ငွေကို နှစ်ကြိမ်တိုင်တိုင် စုဆောင်းခဲ့ရပုံ၊ မိုင်ငါးဆယ်ခရီးကိုလည်း ခြေကျင် လျှောက်လာခဲ့ရပုံနှင့် သမ္မာကျမ်းစာကို ဖတ်ရှုလေ့ လာလိုစိတ် ပြင်းပြပုံတို့ကို ဆရာကြီးအား အသေး စိတ် ရှင်းပြခဲ့သည်။ သူမ၏ လေးနက်သော ယုံကြည် ခြင်းနှင့် နှုတ်ကပတ်တရားတော်အပေါ် အလွန်တရာ တန်ဖိုးထားခြင်းတို့ကို ဆရာကြီးသည်သိမြင်၍ မိမိ၌ တစ်အုပ်တည်းသာ ကျန်နေသည့် သမ္မာကျမ်းစာအုပ် ကို မေရီဂျုံးအား ပေးလိုက်လေသည်။ သူမသည် လွန်စွာ ဝမ်းမြောက်ဝမ်းသာဖြစ်ကာ ဆရာကြီးအား ကျေးဇူးတင်ကြောင်း ပြောဆိုပြီး မိမိနေရပ်ဒေသသို့ ပျော်ရွှင်စွာ ပြန်လာခဲ့လေသည်။

မေရီဂျုံး၏ သမ္မာကျမ်းစာအား တန်ဖိုးထား မှု၊ လိုလားတောင့်တမှုနှင့် လေးစားမှုတို့ကြောင့် ခရစ် နှစ် ၁၈ဝ၄ ခုနှစ်တွင် သမ္မာကျမ်းစာစောင်များ၊ ကျမ်း ပိုဒ်များ ဖြန့်ဝေသော အသင်း (The Bible Tracts Society) က ဝေးလ်စ်ပြည်နယ်ရှိ ခရစ်ယာန်များအား ဖြန့်ဝေပေးရန် ဆုံးဖြတ်သည့်အချိန်တွင် အဖွဲ့ဝင် တစ်ဦးဖြစ်သည့် ဆရာကြီးဟူးဖားစ် (Huphers) က ကမ္ဘာတစ်ဝှမ်းရှိ ခရစ်ယာန်များ၌ သမ္မာကျမ်းစာအုပ် လက်ဝယ်ရှိစေရေးအတွက် ကြိုးပမ်းဆောင် ရွက်ရန် တိုက်တွန်းလျက် အဆိုတင်သွင်းခဲ့သည်။

ထို့ကြောင့် ခရစ်နှစ် ၁၈ဝ၄ ခုနှစ်အတွင်းတွင် ဗြိတိန်နိုင်ငံနှင့် ပြည်ပနိုင်ငံများရှိ သမ္မာကျမ်းစာ အသင်းကြီး (The British and Foreign Bible Society) ကို စတင်ဖွဲ့စည်းခဲ့သည်။ ထိုအဖွဲ့အစည်း၏ ကြိုးပမ်းဆောင်ရွက်မှုကြောင့် တစ်ဆင့်ပြီးတစ်ဆင့်မြန်မာနိုင်ငံ အပါအဝင် နိုင်ငံအများအပြားတွင် သမ္မာ ကျမ်းစာအသင်းများကို ဖွဲ့စည်းတည်ထောင်နိုင်ခဲ့ လေသည်။

မြန်မာနှစ်ခြင်းခရစ်ယာန်အသင်းတော်များ တွင် နှစ်စဉ် သြဂုတ်လ၊ တတိယပတ် တနင်္ဂနွေနေ့ တွင် ‘သမ္မာကျမ်းစာနေ့” ကို ဆင်ယင်ကျင်းပကြပြီး ထိုနေ့တွင် သမ္မာကျမ်းစာ၏ တန်ဖိုးကို အလေးထား ဖော်ပြကြကာ ကျေးဇူးတော်ချီးမွမ်းလေ့ရှိသည်။ သမ္မာကျမ်းစာအသင်းကြီး၏ လုပ်ငန်းစဉ်များကို တင်ပြကြပြီး လုပ်ငန်းစဉ်များအတွက် အလှူတော်ငွေ များ ပေးလှူကြပါသည်။

အကိုးအကား

ဘုရားသခင်၏သဏ္ဌာန်တော်နှင့် ဝိညာဉ်ရေးရာစာစု များ၊ စာစဉ်(၁)၊ မြန်မာနိုင်ငံနှစ်ခြင်းခရစ်ယာန် အသင်း တော်များ အဖွဲ့ချုပ်၊ လူငယ်ဌာန။

• သိက္ခာတော်ရဆရာ စောထွန်းထွန်းလင်း၊ သမိုင်း တွင်သည့် နေ့ရက်များ၊ ကောင်းချီးမိုး ခရစ်ယာန်စာပေ၊ ၂၀၁၂။

ဉာဏ်ကျော်ခေါင်